Skip to main content
Preken

Zaterdag 3-2-2024: Hillige Mès in ’t Eeserplat.

By 5 februari 2024februari 16th, 2024No Comments

Mieng  leef carnavaliste,

D’r Job, woëuvver de iësjte lèëzing gong wòar inge erme kèël. Hem wòar al aafgenòame wat hèë how. Dat is nit gét wat ós in dizze tied gans vrèëm is. Kiekste nòa d’r tillevies dan zieste dat dat in ózze tied duks vuur kunt in leng wòa kreeg is of anger erg dinger gebuure. Gelukkig kinne vier in ós durp en ós ganse sjtrieëk mit de carnaval  lòate zieë wie good vier ’t hant en wievueël lèëve in ós is.

Noch effe wieër uvver d’r Job, dèë warsjienlik nit ech bestange hat. An hem hat men in der Biebel kinne oetlèëge wie me mit leed kint  umgòa. ‘T ieësj wòar d’r Job inge rieke maan mit ee groeët gezin, vueël wirkluuj en alle sòate vieë. Hèë wòar ooch gans godsgetruij en good vuuër zieng luj. Hèë how ‘t good. Vanzelfsjprèëkend good. Hèë how dòa ooch hèl vuur gewirkt. Wat koeët hem gebuure? Mè in enge korte tied woeëd hem alles aafgenòame en how hèë nuuks mieë, gee gezin,gee vieë en ooch zieng gezondheed woeët aagetast. Luuj die ummer zieng vrung gewèë wòare date, wie gikkeringe in dèë tied, wennt inge gèt ergs uvverkòame wòar: hèë zal ’t d’rnòa gemakt haan, hèë mot wal vueël zung begange haan. Wie vier wete wòar dat nit zoèë. Job kòam alling te stòa en klaaget op d’r doeër der Hergott aa, d’r gèëver van ‘t lèëve. God goof ooch antwòad en zaat tèëge Job: ‘woe wòasj du wie ich alles gemakt han, de èërd en al wat dòa op is, de plante en de deere, de luuj. woe wòajs du? Du has eegelich alles kriëge en du has gedaat dat alles van dich wòar. En Job daat nòa en moeë toegèëve dat ‘t lèëve en al zienge riekdom beij al zie eege werk ooch ing gaaf wòar, ee nit te begriepe mysterie. En wie hèë dat akseptere koët woeët hèë bèëter, bedanket d’r Hergot, gong wer an d’r sjlaag en kroog ‘t nog bèëter es wie hèë ut gehat how.

 

In ‘t Evangelie van huuj kint Jezus, ós Herrgötje, de pieng van luuj en van de uvverheed wennt neet nòa Hem en zing gow wueëd geloesterd wèëd; de pieng va durch zieng lieërlinge en betste vrung in der sjtieëk gelòate te wèëde; de pieng van dat hèë sterve moeët an ee kruuts. Ooch hèë klaagde: ‘God mienge God wòarum hast du mich in der sjtieëk gelòate??. Effe dòanòa vertrowwet hèë zich èëvel toe an d’r zelfde God: ‘Vader, in der Hiëmel in uuch heng bevèël ich mienge lèëvensgeest’. Auch hèë noom aa wat hem uvverkòam. Mit Pòasje kòam Hèë durch zienge en ozze Vader in d’r Hiëmel tot lèëve. Dòamit hat der Herregot duudelik gemakt: t lèëve uevverwint koeëd en doeëd .

 

Dat gekrieëge lèëve vieëre vier mit de Carnaval. Ver lòate zieë wievueël lèëve in ós is en wie vier van ’t lèëve hotte. Carnaval verbingt de luuj mitee , gikkerenge is mit gikjkerenge. Vier zund dankbaar en make sjpass. Lòate vieër dòa volop van geneete. Vier weete èvvel ooch dat nòa de carnaval wer inge angere tied kunt. Dan motte vier ós geleuf in t lèëve nit verleeze. De lèëzinge van huuj wille ós mood gèëve. Ooch in minder gowwe tied is d’r Herrgot mit ós. Vergèëte vier dat nit. Dr Vastentied herinnert ós dòa-aan. Mit Esjgoonstig komme vier wèr heij in ós kerk beijee um dat te viere.

Amen.

Meneer pastoeër Reijne.